१५, मंसिर २०८२

बाँके ।नेपालगन्जमा आयोजित पत्रकार सम्मेलनमा नेपाली कम्युनिष्ट पार्टीका नेता भीम रावलले आगामी दिनमा देशको नेतृत्व आफ्नो पार्टीले गर्ने दाबी गर्दै पार्टीको नयाँ संकल्प र प्रतिबद्धताबारे स्पष्ट धारणा प्रस्तुत गरेका छन्।

नेता रावलले विगतमा भएका गल्तीहरू दोहोरिन नदिने पार्टीको दृढ प्रतिवद्धता रहेको उल्लेख गर्दै, जनताको भरोसा र विश्वास पुनः प्राप्त गर्न पार्टी तयार रहेको बताउनुभयो। “विगतको कमजोरी दोहोरिँदैन, दोहोरिन दिइँदैन,” रावलको स्पष्ट भनाइ थियो।

🔹 कुशासन र भ्रष्टाचारमुक्त शासनको प्रतिबद्धता

रावलले कुशासन र भ्रष्टाचारविरुद्ध कठोर अभियान छेड्ने बताउँदै इमानदारीका साथ शासन सञ्चालन गर्न पार्टी प्रतिबद्ध रहेको उल्लेख गरे। “हामी इमानदारीपूर्वक कुशासन र भ्रष्टाचार अन्त्यतर्फ लाग्छौँ, यसमा जनता हाम्रो पक्षमा रहने विश्वास छ,” उनले भने।

🔹 राष्ट्रिय अर्थतन्त्र सुदृढीकरणमा गम्भीर

देशको कमजोर अर्थतन्त्रलाई सबल बनाउनेतर्फ पार्टी विशेष योजनासहित अघि बढ्ने रावलले बताए। राष्ट्रिय उत्पादन वृद्धि, स्वदेशी उद्योग संरक्षण र युवालाई रोजगारमुखी कार्यक्रम प्राथमिकतामा रहने उनले बताए।

🔹 केपी ओलीको अभिव्यक्तिप्रति आपत्ति

एमाले अध्यक्ष केपी शर्मा ओलीले केही वरिष्ठ नेताहरूलाई लक्षित गर्दै ‘वृद्धाश्रम’ भनेको अभिव्यक्तिप्रति नेता रावलले कडा आपत्ति जनाए।
“पार्टीका वरिष्ठ नेताप्रति यस्तो जथाभाबी टिप्पणी उचित होइन,” रावलले भने। उनले नेतृत्व तहमा परस्पर सम्मानको संस्कृति जरुरी रहेको पनि जोड दिए।

🔹 सरकार युवाको भावना बुझ्न असफल

रावलले हालको सरकारले युवाको भावना र अपेक्षालाई सम्बोधन गर्न नसकेको आरोप लगाए।
उनका अनुसार हालैको नवयुवाहरूको विद्रोहपछि सरकार बने पनि सरकारले युवाहरूको आवाजलाई प्राथमिकतामा राख्न नसकेको छ।

नेता रावलको आजको प्रेस सम्बोधनले नेपाली कम्युनिष्ट पार्टी आगामी राजनीतिक प्रतिस्पर्धामा अग्रसर हुने संकेत दिएको छ। सुशासन, पारदर्शिता र राष्ट्रिय अर्थतन्त्र सुधारलाई प्रमुख एजेन्डा बनाउँदै पार्टीले नयाँ नेतृत्वको विकल्प प्रस्तुत गर्ने संदेश रावलले दिएका छन्।