२३, भदौ २०८२

जुम्ला ।आइतबार निजामती सेवा दिवस–२०८२ को अवसरमा जुम्लामा आयोजित फुटबल प्रतियोगिताले कर्मचारीहरूको फरक रूप उजागर गर्यो। सामान्यतया कार्यालयका दराज र फाइलमै सीमित देखिने उनीहरू मैदानमा उत्साही खेलाडीका रूपमा चम्किएका थिए।

जुम्लाको सदरमुकाम खलङ्गास्थित नेपाली सेनाको टुडिखेल मैदानमा आयोजित प्रतियोगिता केवल खेल मात्र रहेन, बरु सहकर्मीबीच आत्मीयता, स्वास्थ्यप्रतिको चासो र आपसी सम्बन्धलाई अझ मजबुत बनाउने अवसरका रूपमा परिणत भयो।

“हामी देशको सेवा गर्छौं तर आफैंलाई सेवा गर्न बिर्सिन्छौं,” खेलपछि भिजेको जर्सीमै उभिएकी पातारासी गाउँपालिकाकी शाखा प्रमुख भगवती गिरीले भनिन्, “आजको दिनले मलाई सम्झायो, देशसेवक हुनु भनेको काममै गुम्सिनु मात्र होइन, जीवन्तता जोगाउनु पनि हो।”

प्रतियोगितामा प्रशासनतर्फ र प्राविधिकतर्फ दुवै समूहका महिला तथा पुरुष टिमले सहभागिता जनाए। महिला समूहमा प्राविधिक टिमले प्रशासन टिमलाई २–० गोल अन्तरले पराजित गर्दै उपाधि जित्यो भने पुरुष समूहमा पनि प्राविधिक टिम २–१ गोल अन्तरले विजयी बन्यो।

समापन समारोहमा विजेता दुवै प्राविधिक टिमलाई नगद १० हजार ५ सय रुपैयाँसहित सम्मानपत्र प्रदान गरियो। उपविजेता प्रशासनतर्फका महिला तथा पुरुष टिमलाई प्रमाणपत्र वितरण गरियो।

प्रमुख जिल्ला अधिकारी केदारनाथ शर्माले उद्घाटन मन्तव्यमा भने, “आजको खेलले देखायो– जब कर्मचारी खुशी हुन्छन्, संस्था बलियो बन्छ। यस्तो प्रेरणाले सेवा प्रवाहमा नयाँ ऊर्जा थप्छ।”

“स्वास्थ्यका लागि खेलकुद, राष्ट्रका लागि खेलकुद” भन्ने नारासहित सम्पन्न कार्यक्रम कुनै अप्रिय घटना बिना सफलतापूर्वक सम्पन्न भएको आयोजक समितिले जनाएको छ।

खेल मैदानमा चम्किएका ती कर्मचारीहरूले एउटा सन्देश दिए– उनीहरू केवल सेवाग्राहीका गुनासो सुन्ने कर्मचारी मात्र होइनन्, उनीहरू पनि नागरिक हुन्; जसलाई खुसी, स्वास्थ्य र सहकार्य चाहिन्छ।

यस दिनको फुटबलले सम्झायो– निजामती सेवा केवल कागजी औपचारिकता होइन, मानवीय सम्बन्ध र जीवन्तताको निरन्तर खोज पनि हो।