“सरकारी खर्चबिना सम्पन्न मन्त्री शाहीको नर्वे भ्रमणप्रति मन्त्रालयको प्रष्टोक्ति”

वनमन्त्रीको नर्वे भ्रमण: नेपालको संरक्षण प्रयास सुदृढ गर्न उद्देश्यकेन्द्रित सहभागिता

सञ्चारमाध्यममा वन तथा वातावरण मन्त्री ऐन बहादुर शाही ठकुरीको नर्वे भ्रमणसम्बन्धी आएका समाचारप्रति मन्त्रालयले स्पष्टिकरण दिएको छ। मन्त्रालयका अनुसार मन्त्री शाही २०८२ साउन ९ देखि १४ गतेसम्म नर्वेमा आयोजित Strengthen Co-operation Program मा नेपालको तर्फबाट औपचारिक निमन्त्रणामा सहभागी भएका थिए।

उक्त कार्यक्रममा सहभागी हुन University of Inland Norway बाट २०८२ असार २० गते मन्त्री शाहीलाई नेपाल सरकारमार्फत डेनमार्कस्थित नेपाली दूतावास तथा परराष्ट्र मन्त्रालयमार्फत निमन्त्रणा प्राप्त भएको थियो। मन्त्रिपरिषद्बाट मिति २०८२ असार २३ गते स्वीकृति प्राप्त भई मन्त्री शाहीलाई सहभागिता दिइएको मन्त्रालयद्वारा जनाइएको छ।

मन्त्रालयका अनुसार भ्रमणमा नेपाल सरकारलाई कुनै थप आर्थिक दायित्व नपर्ने गरी स्वीकृति दिइएको थियो। भ्रमणको सम्पूर्ण खर्च आयोजक संस्थाले बेहोरेको र अन्य खर्च व्यक्तिगत रुपमा व्यवस्थापन गरिएको स्पष्ट गरिएको छ।

भ्रमणको क्रममा University of Inland Norway का उच्च पदस्थ व्यक्तिहरूसँग द्विपक्षीय सहकार्य र क्षमता अभिवृद्धि विषयमा महत्वपूर्ण छलफल भएको थियो। साथै, नर्वे सरकारका परराष्ट्र मन्त्रालयकी उपमन्त्री Stine Renate Haheim सँग जलवायु परिवर्तन, जैविक विविधता संरक्षण र क्षमता विकासका विषयमा उच्चस्तरीय विचारविमर्श सम्पन्न भएको थियो।

त्यस्तै, नर्वे सरकारले संरक्षण गरिरहेका दुर्लभ वन्यजन्तुजस्तै “रेन डियर” र “आर्कटिक फ्याउरो” संरक्षण प्रयासको फिल्ड अध्ययनबाट नेपालको संरक्षण रणनीतिका लागि महत्वपूर्ण ज्ञान र अनुभव हासिल भएको मन्त्रालयले जनाएको छ।

यस भ्रमणले नेपाल र नर्वेबीचको द्विपक्षीय सम्बन्ध, विशेषतः जैविक विविधता संरक्षण र पारिस्थितिकीय प्रणाली अनुसन्धानमा सहकार्यलाई थप सुदृढ बनाएको मन्त्रालयको दाबी छ। साथै, भ्रमणले दुई देशबीचको कूटनीतिक सम्बन्धलाई समेत थप घनिष्ठ बनाउने अपेक्षा गरिएको छ।

मन्त्रालयले भ्रमणबारे सार्वजनिक भएका समाचार तथा टिप्पणीकालागि यो भ्रमण औपचारिक, उद्देश्यपूर्ण र राष्ट्रको दीर्घकालीन हितसँग जोडिएको स्पष्ट पारेको छ।