२१, माघ २०८२
बाँके ।बाँकेको जानकी गाउँपालिकामा यस वर्षको माध्यमिक शिक्षा परीक्षा (एसईई) लाई लक्षित गर्दै विद्यालयहरूमा तयारी तीव्र पारिएको छ । विद्यार्थीहरू नियमित अभ्यास र पुनरावलोकनमा व्यस्त रहेका छन् भने शिक्षकहरू नतिजा सुधार गर्ने रणनीति निर्माण र कार्यान्वयनमा सक्रिय देखिएका छन् । यसै सन्दर्भमा गाउँपालिकाको शिक्षा शाखाले सञ्चालन गरेको प्रि–टेस्ट परीक्षा विद्यार्थीको वास्तविक शैक्षिक अवस्था मापन गर्ने प्रभावकारी माध्यम बनेको छ ।
जानकी गाउँपालिकाले गत वर्षको एसईई नतिजा अपेक्षाअनुसार आउन नसकेपछि यस वर्षदेखि शैक्षिक गुणस्तर सुधार गर्ने उद्देश्यले विशेष कार्यक्रम सञ्चालन गरेको जनाएको छ । गाउँपालिकाका निमित्त प्रमुख प्रशासकीय अधिकृत मतिन अन्सारीले विगतको नतिजा विश्लेषणपछि यस वर्ष योजनाबद्ध ढंगले कार्यक्रम अघि बढाइएको जानकारी दिनुभयो । उहाँका अनुसार प्रि–टेस्ट परीक्षा सञ्चालन गर्न गाउँपालिकाले छुट्टै बजेट विनियोजन गरेको छ, जसले विद्यार्थीको सिकाइ अवस्था पहिचान गर्न महत्वपूर्ण भूमिका खेलेको छ ।
अन्सारीले विद्यार्थीहरूको क्षमता र सिकाइ स्तर फरक–फरक हुने भएकाले उनीहरूको वास्तविक शैक्षिक अवस्था पहिचान गर्न प्रि–टेस्ट जस्ता कार्यक्रम आवश्यक रहेको बताउनुभयो । उहाँले भन्नुभयो, “प्रि–टेस्टले विद्यार्थीको कमजोरी पत्ता लगाउन सहयोग पुर्‍याउँछ । यसले शिक्षकलाई पनि कुन विषयमा बढी ध्यान दिनुपर्ने भन्ने स्पष्ट मार्गदर्शन मिल्छ । यस वर्ष नतिजा सुधार्ने हाम्रो लक्ष्य छ ।”
गाउँपालिकाको सामाजिक विकास समिति संयोजक राम अचल धोबीले पनि प्रि–टेस्ट कार्यक्रमले शैक्षिक क्षेत्रमा सकारात्मक परिवर्तन ल्याएको बताउनुभयो । उहाँका अनुसार यसले केवल नतिजा सुधार गर्ने मात्र होइन, सिकाइ प्रक्रियालाई व्यवस्थित र योजनाबद्ध बनाउन मद्दत पुर्‍याएको छ । विद्यार्थीको तयारी अवस्था समयमै मूल्याङ्कन गर्न सक्दा शिक्षक तथा विद्यालय प्रशासनलाई सुधारका उपाय अवलम्बन गर्न सहज भएको उहाँको भनाइ छ ।
शिक्षा शाखा प्रमुख कृष्णा कुमारी भण्डारीका अनुसार यस वर्ष जानकी गाउँपालिकाबाट कुल २७९ जना विद्यार्थी एसईई परीक्षामा सहभागी हुँदैछन् । उहाँले प्रि–टेस्ट कार्यक्रमलाई समग्र तयारीको महत्वपूर्ण चरणको रूपमा लिइएको बताउनुभयो । “विद्यार्थीको वास्तविक अवस्था थाहा पाउन प्रि–टेस्ट प्रभावकारी देखिएको छ । यसले विद्यालय र शिक्षकलाई विद्यार्थी केन्द्रित शिक्षण रणनीति बनाउन सहयोग गरेको छ,” उहाँले भन्नुभयो ।
सहायक शिक्षा अधिकृत झुमी कुमारी वलीले प्रि–टेस्ट परीक्षा केवल विद्यार्थी मूल्याङ्कनको माध्यम मात्र नभई पाठ्यक्रम कार्यान्वयन, शिक्षण विधि तथा शैक्षिक अनुगमन सुधार गर्ने आधार बनेको उल्लेख गर्नुभयो । उहाँका अनुसार प्रि–टेस्टबाट प्राप्त नतिजाको आधारमा विद्यालयहरूलाई आवश्यक सुझाव र मार्गदर्शन प्रदान गरिएको छ । यसले आगामी एसईई परीक्षामा सकारात्मक प्रभाव पार्ने अपेक्षा गरिएको छ ।
विद्यालय तहमा पनि प्रि–टेस्ट प्रभावकारी देखिएको छ । जानकी माध्यमिक विद्यालयका प्रधानाध्यापक चक्रबहादुर रावतले प्रि–टेस्टपछि विद्यार्थीहरूको आवश्यकता अनुसार विशेष कक्षा तथा अतिरिक्त अभ्यास कार्यक्रम सञ्चालन गरिएको जानकारी दिनुभयो । उहाँका अनुसार कमजोर विषयमा केन्द्रित अभ्यास गराउँदा विद्यार्थीको आत्मविश्वास बढेको छ र सिकाइमा सुधार आएको छ ।
विद्यार्थीहरूले पनि प्रि–टेस्ट कार्यक्रमलाई उपयोगी अनुभवका रूपमा लिएका छन् । प्रि–टेस्टमा सहभागी विद्यार्थी राजेन्द्र काँदुले यस्तो अभ्यास परीक्षाले आफ्ना कमजोरी पहिचान गर्न सहयोग पुगेको बताउनुभयो । उहाँले भन्नुभयो, “प्रि–टेस्टले एसईईको वास्तविक वातावरण अनुभूति गरायो । यसले परीक्षा प्रतिको डर कम गर्नुका साथै तयारी कसरी गर्ने भन्ने स्पष्ट बनायो ।”
समग्रमा हेर्दा जानकी गाउँपालिकाले सञ्चालन गरेको प्रि–टेस्ट परीक्षा विद्यार्थी, शिक्षक र विद्यालयका लागि प्रभावकारी तयारीको आधार बनेको देखिएको छ । योजनाबद्ध अभ्यास, अतिरिक्त कक्षा र नियमित अनुगमनका कारण यस वर्ष एसईई नतिजा सुधार हुने विश्वास स्थानीय तहका सरोकारवालाहरूले व्यक्त गरेका छन् । गाउँपालिकाले आगामी दिनमा पनि शैक्षिक गुणस्तर अभिवृद्धिका लागि यस्ता कार्यक्रमलाई निरन्तरता दिने तयारी गरेको जनाएको छ ।