६, चैत २०८२

बाँके ।नेपालको उच्च शिक्षालाई केवल अनुसन्धान–केन्द्रित नभई प्रभाव–केन्द्रित बनाउने लक्ष्यसहित मध्यपश्चिम विश्वविद्यालयले “Mid-West University Multidisciplinary International Conference 2026 (MUMIC–2026)” अन्तर्गत Research-to-Impact Track सञ्चालन गर्ने भएको छ। आगामी अप्रिल २४ देखि २६, २०२६ सम्म कर्णाली प्रदेशको राजधानी सुर्खेतस्थित विश्वविद्यालयको केन्द्रीय कार्यालयमा आयोजना हुने उक्त सम्मेलनले अनुसन्धानलाई व्यवहारिक प्रभावमा रूपान्तरण गर्ने नयाँ पहलको सुरुआत गर्ने विश्वास गरिएको छ।
विश्वविद्यालयका अनुसार, Research-to-Impact Track लाई राष्ट्रिय शैक्षिक रूपान्तरणको महत्वपूर्ण कदमका रूपमा अघि बढाइँदैछ। यस कार्यक्रममार्फत विश्वविद्यालयीय अनुसन्धानलाई केवल प्रकाशनमा सीमित नराखी सामाजिक, आर्थिक तथा नीतिगत क्षेत्रमा प्रत्यक्ष प्रभाव पार्ने दिशामा रूपान्तरण गर्ने लक्ष्य राखिएको छ।
कार्यक्रमका संयोजक तथा अन्तर्राष्ट्रिय सम्बन्ध निर्देशनालयका कार्यकारी निर्देशक डा. यदु प्रसाद ज्ञवालीले अनुसन्धानको उपयोगितालाई जोड दिँदै अहिलेको आवश्यकता अनुसन्धानलाई व्यवहारिक उपलब्धिसँग जोड्नु भएको बताए। उनका अनुसार, यो ट्र्याकले विचारदेखि प्रोटोटाइप, उद्यम र नीति कार्यान्वयनसम्मको स्पष्ट मार्गचित्र प्रदान गर्दै नवप्रवर्तन संस्कृतिको संस्थागत विकासमा सहयोग पुर्‍याउनेछ।
वरिष्ठ शिक्षाविद् प्रा. डा. चन्द्रप्रसाद रिजालले यस पहललाई नेपालको अनुसन्धान प्रणालीमा उत्तरदायित्व, गुणस्तर र प्रभावकारिताको नयाँ मापदण्डका रूपमा व्याख्या गरेका छन्। उनले ज्ञानको वास्तविक महत्व समुदाय र राष्ट्रको जीवनस्तर उकास्न सक्ने क्षमतामा निहित रहने उल्लेख गर्दै विश्वविद्यालय–उद्योग–सरकारबीचको सहकार्यलाई यसले थप सुदृढ बनाउने विश्वास व्यक्त गरे।
विश्वविद्यालयका उपकुलपति प्रा. डा. ध्रुवकुमार गौतमले दिगो विकास लक्ष्यसँग अनुरूप अनुसन्धानलाई राष्ट्रिय समृद्धिको माध्यम बनाउने प्रतिबद्धता जनाएका छन्। उनले Research-to-Impact Track विश्वविद्यालयको रणनीतिक प्राथमिकता भएको उल्लेख गर्दै यसले विश्वविद्यालयलाई क्षेत्रीय नवप्रवर्तन केन्द्रका रूपमा स्थापित गर्ने धारणा राखे।
त्यसैगरी, रजिस्ट्रार प्रा. डा. शोभाखर कँडेलले बौद्धिक सम्पत्ति व्यवस्थापन, प्रविधि हस्तान्तरण तथा उद्यमशील सहकार्यलाई प्रोत्साहन गर्ने नीति तथा संरचना विकास भइरहेको जानकारी दिए। उनले अनुसन्धानकर्तालाई प्रयोगशालादेखि बजारसम्मको यात्रामा सहजीकरण गरिने बताए।
विभिन्न संकायका डीनहरूले यस कार्यक्रमलाई अन्तरविषयक सहकार्य सुदृढ गर्ने ऐतिहासिक अवसरका रूपमा लिएका छन्। उनीहरूका अनुसार शिक्षा, कृषि, वन, व्यवस्थापन, विज्ञान तथा सामाजिक विज्ञानबीचको समन्वयमार्फत मात्र समावेशी र दिगो समाधान सम्भव हुन्छ।
यस ट्र्याक अन्तर्गत शिक्षा तथा डिजिटल रूपान्तरण, जलवायु परिवर्तन र दिगो कृषि, स्वास्थ्य तथा सामुदायिक विकास, कृत्रिम बुद्धिमत्ता तथा उदीयमान प्रविधि, तथा आदिवासी ज्ञान प्रवर्द्धनजस्ता विषयमा अवधारणा प्रस्ताव आह्वान गरिएको छ। इच्छुक सहभागीहरूले आगामी मार्च २०, २०२६ भित्र आफ्नो अवधारणा पेश गर्न सक्नेछन्।
छनोट भएका सहभागीहरूलाई भर्चुअल ‘Venture Bootcamp’, ‘Scaling Workshop’, ‘Investor Connect’ तथा प्रत्यक्ष पिचिङ सत्रमार्फत उद्योग, लगानीकर्ता र नीतिनिर्मातासँग अन्तरक्रिया गर्ने अवसर प्रदान गरिनेछ। उत्कृष्ट नवप्रवर्तनलाई ‘MUMIC Innovation Award’, ‘Best Research-to-Impact Award’ तथा इन्क्युबेशन सहयोग प्रदान गरिने जनाइएको छ।
समग्रमा, Research-to-Impact Track केवल सम्मेलनको एउटा कार्यक्रम मात्र नभई अनुसन्धानलाई कार्यान्वयन, नवप्रवर्तनलाई उद्यम र ज्ञानलाई दिगो प्रभावमा रूपान्तरण गर्ने शैक्षिक अभियानका रूपमा अगाडि बढाइएको विश्वविद्यालयले जनाएको छ। यस पहलमा राष्ट्रिय तथा अन्तर्राष्ट्रिय अनुसन्धानकर्ता, प्राध्यापक, विद्यार्थी, उद्योग प्रतिनिधि तथा नीतिनिर्मातालाई सहभागी भई नेपालको नवप्रवर्तन भविष्य निर्माणमा सहकार्य गर्न आह्वान गरिएको छ।