सुर्खेत ,१३ बैशाख ।
सुर्खेतमा मानव एकता दिवस विशेष उत्साहका साथ मनाइएको छ। मानवता, सेवा र एकताको सन्देश बोकेको यो दिवस “रगत नालीमा होइन, नाडीमा बगाऔं” भन्ने बाबा हरदेव सिंह महाराजको प्रेरणादायी भनाइलाई आत्मसात गर्दै रक्तदानसहित विविध कार्यक्रमका साथ मनाइएको हो।
सन्त निरंकारी सत्संग भवन सुर्खेतले वीरेन्द्रनगर नगरपालिका–१, सोलीघोप्टेमा आयोजना गरेको विशेष कार्यक्रममा मानव एकताको महत्वलाई उजागर गर्दै प्रेम, सद्भाव र भाइचाराको सन्देश फैलाइएको थियो। कार्यक्रममा प्रमुख अतिथिका रूपमा उपस्थित दीपमाला गुडियाले मानव सेवा नै सबैभन्दा ठूलो धर्म भएको उल्लेख गर्दै समाजमा एकता र सद्भाव कायम गर्न यस्ता कार्यक्रम प्रभावकारी हुने बताइन्।
कार्यक्रमको मुख्य आकर्षण रक्तदान कार्यक्रम रह्यो। रक्तदानमार्फत जीवन बचाउने कार्यलाई मानव सेवाको सर्वोत्तम उदाहरणका रूपमा प्रस्तुत गर्दै सहभागीहरूले सामाजिक उत्तरदायित्वप्रति आफ्नो प्रतिबद्धता व्यक्त गरेका थिए। साथै सत्संग कार्यक्रममा प्रस्तुत भजन तथा आध्यात्मिक वाणीमार्फत सन्त महात्माहरूले मानव एकता, प्रेम र सद्भावका विचार प्रवाह गरेका थिए। आध्यात्मिक सन्देशले उपस्थित सहभागीहरूलाई भावनात्मक रूपमा जोड्दै समाजमा भाइचाराको भावना बलियो बनाउने प्रेरणा दिएको थियो।
कार्यक्रम सञ्चालन रेश्मा रेग्मीले गरेकी थिइन् भने स्वागत मन्तव्य लिलाराम पुरीले राखेका थिए। कार्यक्रममा सहभागीहरूले विश्वमा शान्ति स्थापना र सामाजिक सद्भाव अभिवृद्धिका लागि मानव एकता अपरिहार्य रहेको धारणा व्यक्त गरेका थिए।
सन्त निरंकारी मण्डलले हरेक वर्ष मानव एकता दिवस मनाउँदै आएको जानकारी दिँदै सुर्खेत सेवा दलका सञ्चालक बलभद्र पुरीले विश्वभर मानव समुदायबीच शान्ति, सद्भाव र भाइचाराको सम्बन्ध सुदृढ गर्ने उद्देश्यले यो दिवस मनाइने गरेको बताए।
मानव एकता दिवसको अवसरमा सुर्खेतमा आयोजित रक्तदान तथा आध्यात्मिक कार्यक्रमले “मानवता नै सबैभन्दा ठूलो धर्म हो” भन्ने सन्देश पुनः स्थापित गरेको छ। यस्ता कार्यक्रमले समाजमा सहयोग, सहअस्तित्व र पारस्परिक सद्भावको भावना अभिवृद्धि गर्दै मानव एकताको महत्वलाई थप बलियो बनाउने विश्वास लिइएको छ।
