कोहलपुर, २७ साउन

अन्तर्राष्ट्रिय युवा दिवस–२०८३ (अगस्त १२) को अवसरमा राष्ट्रिय स्वतन्त्र पार्टी (रास्वपा) लुम्बिनी प्रदेशअन्तर्गतका विभिन्न जिल्ला समितिहरूले युवालाई केन्द्रमा राखेर विविध सामाजिक तथा रचनात्मक कार्यक्रम सञ्चालन गरिरहेका छन् ।

‘युवा सामाजिक उत्तरदायित्व, नेतृत्व विकास र मानवीय सेवामा’ जोड दिने उद्देश्यसहित श्रावण २३ गतेदेखि ३० गतेसम्म प्रदेशका विभिन्न जिल्लामा कार्यक्रम आयोजना गरिएको रास्वपा लुम्बिनी प्रदेशले जनाएको छ ।

कार्यक्रमअन्तर्गत वातावरण संरक्षण, सरसफाइ, वृक्षारोपण, रक्तदान, स्वास्थ्य परीक्षण, मानसिक स्वास्थ्य सचेतना, लागुऔषधविरुद्ध अभियान, साइबर सुरक्षा, स्वरोजगार तथा नेतृत्व विकासलगायतका गतिविधि सञ्चालन भइरहेका छन् ।

दाङ जिल्लाका १० वटै स्थानीय तहमा एकैसाथ बृहत् रक्तदान कार्यक्रम आयोजना गर्ने तयारी गरिएको छ । त्यस्तै, गुल्मीमा मानसिक स्वास्थ्य, तनाव तथा क्रोध व्यवस्थापनसँगै साइबर सुरक्षा र सामाजिक सञ्जालको जिम्मेवार प्रयोगसम्बन्धी सचेतना कार्यक्रम सञ्चालन भएको छ ।

बाँकेमा विद्यालयस्तरीय कार्यक्रम, योग शिविर तथा धार्मिक स्थल सरसफाइ, प्युठानमा सबै स्थानीय तहमा सरसफाइ र ट्राफिक सचेतना, कपिलवस्तुमा युवा स्वरोजगार, कृषक समस्या सहजीकरण तथा सामाजिक सद्भाव र्‍याली आयोजना गरिएको छ ।

बर्दियामा लागुऔषधविरुद्ध विद्यालय तथा समुदायस्तरीय प्रशिक्षण, पश्चिम नवलपरासीमा म्याराथन तथा वैदेशिक रोजगारी र डिजिटल ठगीविरुद्ध सचेतना, रोल्पामा आत्मनिर्भर बन्ने अभिमुखीकरण, ज्येष्ठ नागरिकसँग अन्तरक्रिया तथा सडक मर्मत अभियान सञ्चालन भएका छन् ।

पाल्पामा ‘रूपान्तरणकारी नेतृत्व’सम्बन्धी अभिमुखीकरण तथा धार्मिक स्थल सरसफाइ र अर्घाखाँचीमा विपन्न परिवारलाई खाद्यान्न वितरण तथा शान्ति बगैँचा सरसफाइका कार्यक्रम तय गरिएको छ । रूपन्देहीमा भने युवा दिवसको अवसरमा विभिन्न कार्यक्रमसँगै बृहत् पार्टी प्रवेश कार्यक्रम आयोजना भएको छ । जिल्लामा दन्त परीक्षण, वृक्षारोपणलगायतका कार्यक्रम पनि सञ्चालन भएका छन् ।

रास्वपा लुम्बिनी प्रदेशका महामन्त्री सि.एम. उपाध्यायका अनुसार अन्तर्राष्ट्रिय युवा दिवसको कार्यक्रम रुपन्देहीमा प्रभातफेरी आयोजना गरी समापन गरिनेछ । प्रभातफेरीमा रास्वपा लुम्बिनी प्रदेश कार्यसमितिका सम्पूर्ण पदाधिकारी तथा सदस्यहरूको सहभागिता रहनेछ ।

कार्यक्रम समन्वयको भूमिकामा रहेका केन्द्रीय सदस्य तथा सांसद केपी खनाल र केन्द्रीय सदस्य जमुना शर्माको समेत प्रभातफेरीमा उपस्थिति रहने महामन्त्री उपाध्यायले बताए ।
उनका अनुसार युवा दिवसलाई केवल औपचारिक उत्सवका रूपमा नभई युवाको सामाजिक उत्तरदायित्व, नेतृत्व क्षमता, मानवीय सेवा र आत्मनिर्भरता विकास गर्ने अवसरका रूपमा मनाउने प्रयास गरिएको छ ।

युवा दिवसका कार्यक्रममार्फत युवालाई समाजका विद्यमान समस्या समाधानमा प्रत्यक्ष सहभागी गराउने, सकारात्मक नेतृत्व विकास गर्ने र सामाजिक रूपान्तरणमा योगदान पुर्‍याउने उद्देश्य रहेको रास्वपा लुम्बिनी प्रदेशले जनाएको छ ।

प्रदेशका जिल्लाहरूमा सञ्चालन भइरहेका कार्यक्रमको विविधताले वातावरण संरक्षणदेखि जनस्वास्थ्य, सामाजिक सचेतना, डिजिटल सुरक्षा, स्वरोजगार र नेतृत्व विकाससम्मका विषयलाई युवासँग जोड्ने प्रयास गरिएको देखिन्छ ।