३, फाल्गुन २०८२
सुर्खेत ।यहि फागुन २१ गते हुने प्रतिनिधिसभा निर्वाचनलाई लक्षित गर्दै अखिल नेपाल महिला संघ बिरेन्द्रनगरले शनिबार विरेन्द्रनगरमा नगर भेला भव्य रूपमा सम्पन्न गरेको छ । भेलामा नगरका विभिन्न वडाबाट महिलाहरूको उल्लेखनीय सहभागिता रहेको थियो ।
कार्यक्रममा नेकपा एमालेका सचिब यामलाल कँडेलले समाजमा पुस्तागत सहकार्यको आवश्यकता औंल्याउँदै नयाँ–पुरानोको नाममा जनतालाई भ्रममा पार्ने प्रयास भइरहेको बताए । उनले भने “हाम्रो समाजमा विभिन्न पुस्ता छन् । खास गरि नयाँ र पुराना भनेर जनता बीच भ्रम छर्ने काम भइरहेको छ । छोराछोरीले बुबाआमालाई ‘पुराना’ भनेर लखेटे भने समाज कता जान्छ ?”
उनले सही र गलतलाई तथ्य र विवेकका आधारमा जनताले निर्वाचनमा छुट्याउनुपर्ने धारणा राखे । उनले राजनीतिक रूपमा नेकपा एमाले विजय भइसकेकोले निर्वाचनमा एमाले जित्ने दाबी गरे ।
कँडेलले चुनाव जित्न सामूहिक मेहनत र निरन्तर यात्राको आवश्यकता रहेको उल्लेख गर्दै कार्यकर्तालाई थप सक्रिय भएर लाग्न हुन आह्वान गरे । कार्यक्रममा एमाले केन्द्रिय सदस्य मोहन माया ढकाल, पद्मा खड्का, सुर्खेत क्षेत्र नं. २ का प्रतिनिधिसभा सदस्यका उम्मेदवार कुलमणी देवकोटालगायत नेताहरुको सहभागिता रहेको थियो।
