२१, फाल्गुन २०८२

बाँके ।बाँके जिल्लामा प्रतिनिधिसभा सदस्य निर्वाचन शान्तिपूर्ण र व्यवस्थित रूपमा सम्पन्न भएको छ। प्रारम्भिक विवरणअनुसार जिल्लामा करिब ६३ प्रतिशत मत खसेको जिल्ला निर्वाचन अधिकारी टेकबहादुर शाहीले जानकारी दिनुभयो। उहाँका अनुसार दिनभर कुनै उल्लेखनीय अवरोध, झडप वा अप्रिय घटना बिना मतदान कार्य सम्पन्न भएको हो।
मुख्य निर्वाचन अधिकृतको कार्यालय नेपालगन्जका प्रमुख दीपककुमार दाहालले जिल्लाका तीनवटै निर्वाचन क्षेत्रमा रहेका ८१ वटै वडामा शान्तिपूर्ण रूपमा मतदान सम्पन्न भएको जानकारी दिनुभयो। उहाँले बिहान ७ बजेदेखि सुरु भएको मतदान प्रक्रिया बेलुका ५ बजेसम्म सञ्चालन भएको बताउँदै मतदाताको उत्साहजनक सहभागिता देखिएको उल्लेख गर्नुभयो। “निर्वाचनलाई स्वच्छ, निष्पक्ष र भयरहित वातावरणमा सम्पन्न गराउन सबै पक्षको सहयोग उल्लेखनीय रह्यो,” उहाँले भन्नुभयो।
जिल्लाभर मतदान कार्य सुचारु रूपमा सञ्चालन गर्न करिब २ हजार ४ सय कर्मचारी परिचालन गरिएको थियो। मतदान अधिकृत, सहायक कर्मचारी, स्वयंसेवक तथा प्राविधिक जनशक्ति गरी व्यापक तयारीसहित जनशक्ति खटाइएको जिल्ला निर्वाचन कार्यालयले जनाएको छ। मतदान केन्द्रमा आवश्यक मतपत्र, मतपेटिका, गोपनीय कक्ष तथा अन्य सामग्री समयमै पुर्‍याइएकाले मतदान प्रक्रिया सहज भएको जनाइएको छ।
निर्वाचनलाई सुरक्षित बनाउन ठूलो संख्यामा सुरक्षाकर्मी परिचालन गरिएको थियो। नेपाली सेना, नेपाल प्रहरी, सशस्त्र प्रहरी बल, राष्ट्रिय अनुसन्धान विभागका कर्मचारी तथा निर्वाचन प्रहरी गरी बहु–स्तरीय सुरक्षा व्यवस्थापन गरिएको थियो। सीमा क्षेत्र, संवेदनशील मतदान स्थल तथा भीडभाड हुने स्थानहरूमा विशेष निगरानी राखिएको थियो। सुरक्षा निकायहरूको सक्रिय उपस्थितिका कारण मतदाताले ढुक्क वातावरणमा आफ्नो मताधिकार प्रयोग गर्न पाएका थिए।
मुख्य निर्वाचन अधिकृतको कार्यालयका अनुसार बाँके जिल्लाका तीनवटै निर्वाचन क्षेत्रबाट कुल ३ लाख ५० हजार ३ सय ७१ जना मतदाता रहेका छन्। ती मतदाताका लागि जिल्लाभर १ सय ३९ मतदान स्थलमा ४ सय मतदान केन्द्र स्थापना गरिएको थियो। प्रत्येक मतदान केन्द्रमा मतदाताको सहज आवतजावतका लागि आवश्यक पूर्वाधार र व्यवस्थापन मिलाइएको थियो।
यस पटक निर्वाचन कार्यालयले सबै मतदान केन्द्रहरूलाई अशक्त तथा अपांगतामैत्री बनाउने प्रयास गरेको जनाएको छ। जिल्ला निर्वाचन अधिकारी शाहीका अनुसार जेष्ठ नागरिक तथा शारीरिक रूपमा अशक्त मतदाताका लागि विशेष प्राथमिकता दिइएको थियो। ह्वीलचेयरको व्यवस्था, सहायक स्वयंसेवक परिचालन तथा सहज पहुँच मार्ग निर्माणजस्ता उपाय अवलम्बन गरिएकाले लक्षित समूहलाई मतदानमा सहजता भएको उहाँले बताउनुभयो।
जिल्लाका ८१ वडामा नियमित मतदान केन्द्र राखिनुका साथै कारागारभित्र रहेका कैदीबन्दीका लागि पनि मतदानको व्यवस्था गरिएको थियो। नेपालगन्ज कारागार र नौबस्ता कारागारमा अस्थायी मतदान केन्द्र स्थापना गरिएको थियो। यसका साथै पशु सेवा कार्यालय परिसरमा पनि अस्थायी मतदान केन्द्र सञ्चालनमा ल्याइएको थियो। कुल तीन वटा अस्थायी मतदान केन्द्रमार्फत कैदीबन्दी तथा विशेष परिस्थितिका मतदाताले मताधिकार प्रयोग गरेका छन्।
मतदान सम्पन्न भएसँगै मतपेटिका सुरक्षित रूपमा संकलन गरी तोकिएको मतगणना स्थलतर्फ लैजाने कार्य सुरु गरिएको छ। सुरक्षा घेराभित्र मतपेटिका ढुवानी गरिँदैछ भने सर्वदलीय प्रतिनिधिको उपस्थितिमा मतगणना प्रक्रिया अगाडि बढाइने जनाइएको छ। प्रारम्भिक विवरणअनुसार समग्र मतदान शान्तिपूर्ण, मर्यादित र उत्साहजनक वातावरणमा सम्पन्न भएको निष्कर्ष निर्वाचन कार्यालयले निकालेको छ।
जिल्लावासीको सक्रिय सहभागिता, सुरक्षा निकायको सजगता तथा निर्वाचन कर्मचारीको समन्वयका कारण बाँकेमा यस पटकको निर्वाचन उदाहरणीय रूपमा सम्पन्न भएको सरोकारवालाहरूले बताएका छन्। अब सबैको ध्यान मतगणना र अन्तिम परिणामतर्फ केन्द्रित भएको छ।