सुर्खेत, २२ साउन ।
स्वस्थ जीवनशैली र मानसिक स्वास्थ्य प्रवद्र्धनका लागि योग र ध्यानलाई दैनिक जीवनको अभिन्न अङ्ग बनाउनुपर्नेमा विज्ञहरूले जोड दिएका छन् । कर्णाली प्रदेश आयुर्वेद अस्पताल तथा अनुसन्धान केन्द्र, सुर्खेतले बिहीबार वीरेन्द्रनगरमा आयोजना गरेको ‘स्वास्थ्यकर्मीका लागि मानसिक स्वास्थ्यमा आयुर्वेद र योग’ सम्बन्धी अभिमुखीकरण कार्यक्रममा योग र ध्यान मानव जीवनका लागि असाध्यै महत्त्वपूर्ण रहेको उल्लेख गरियो ।
सामाजिक विकास मन्त्रालयकी सचिव रोशनीकुमारी श्रेष्ठले मानसिक स्वास्थ्य सुधारका लागि योग र ध्यान महत्वपूर्र्ण रहेको बताए । उनले योगले मानिसको ध्यान, विचार र सोचलाई एकाग्र बनाउन मद्दत गर्ने भएकाले मानसिक स्वास्थ्य सुदृढ हुने बताए ।
अव्यवस्थित खानपान, अस्वस्थ जीवनशैली र तनावका कारण देखिएका मानसिक समस्याको समाधानका लागि योग र ध्यान आवश्यक रहेको उनको भनाइ थियो । सचिव श्रेष्ठले आधुनिक चिकित्सा सेवासँगै आयुर्वेदको महत्व पनि बढ्दै गएको बताउँदै कर्णाली प्रदेश सरकारले मानसिक स्वास्थ्य रणनीति निर्माण गरी कार्यान्वयनमा जोड दिएको जानकारी दिए ।
कर्णाली प्रदेश अस्पताल सुर्खेतका मानसिक रोग विशेषज्ञ डा सुशील समदर्शीले मानसिक स्वास्थ्य सुधारका लागि योग र ध्यान उपयोगी हुने बताए । उनले आयुर्वेद र आधुनिक चिकित्सा दुवैको आ–आफ्नो महत्व रहेको उल्लेख गर्दै दुवै प्रणालीलाई समन्वय गरेर अघि बढ्नुपर्ने धारणा राखे ।
प्रदेश आयुर्वेद अस्पताल तथा अनुसन्धान केन्द्रका डा लक्ष्मीनारायण तिवारीले आयुर्वेदको उद्देश्य रोगको मूल कारण पहिचान गरी उपचार गर्नु रहेको बताए । उनले पछिल्लो समय मानसिक स्वास्थ्य समस्या बढ्दै गएकाले यसको रोकथाम र व्यवस्थापनका लागि योग र ध्यान प्रभावकारी उपाय हुनसक्ने बताए । कार्यक्रममा मानसिक स्वास्थ्यसम्बन्धी विभिन्न विषयमा विज्ञले कार्यपत्र प्रस्तुत गरेका थिए ।
