१७,साउन २०८२
मुगु।कर्णाली प्रदेश सरकारले पैतृक सम्पत्ति नामसारी गर्दा लाग्ने कर बढाएको छ । आर्थिक वर्ष २०८२/८३ को बजेटमार्फत अंशबन्डा शीर्षकअन्तर्गत राजस्व शीर्षकको कर बढाइएको हो ।
मालपोल कार्यालयका निमित्त प्रमुख जगत रोकायाका अनुसार साबिकमा अंशबन्डा कर ३० लाख रुपैयाँसम्मको थैली अङ्क जिरो दशमलव दुई प्रतिशत, ३० लाख रुपैयाँ देखि दुई करोड रुपैयाँसम्मको थैली अङ्कमा जिरो दशमलव तीन प्रतिशत र दुई करोड रुपैयाँभन्दा माथिको थैली अङ्कमा जिरो दशमलव पाँच प्रतिशत राजस्व तोकिएको थियो ।
चालु आर्थिक वर्षको बजेटमा राजस्व बढाएर नगरपालिका क्षेत्रमा ३० लाख रुपैयाँसम्मको थैली अङ्कमा एक दशमलव पाँच प्रतिशत, ३० लाखदेखि दुई करोड थैली अङ्कमा दुई प्रतिशत र दुई करोडदेखि माथिको थैली अङ्कमा दुई दशमलव पाँच प्रतिशत पुर्याइएको छ ।
यसैगरी, गाउँपालिकातर्फको अंशबन्डातर्फको राजस्वमा ३० लाख रुपैयाँसम्मको एक प्रतिशत, ३० लाख रुपैयाँदेखि दुई करोडसम्मको थैली अङ्कमा एक दशमलव पाँच प्रतिशत र दुई करोडभन्दा माथिको थैली अङ्कमा दुई प्रतिशत कर तोकिएको निमित्त प्रमुख रोकायाले जानकारी दिए ।
शतप्रतिशतभन्दा धेरै कर बढाएकाले पैतृक सम्पत्ति आफ्नो नाममा र अंशबन्डा गर्न सेवाग्राहीले समस्या मानेका छन् ।
छायानाथ रारा नगरपालिका–२ चैन गाउँका नवराज चौलागाईंले आफूहरूले अंशबन्डा गर्न मालपोत कार्यालय पुगेपछि मात्र राजस्व बढेको सुनेपछि त्यसै फर्किएको बताए ।
