बाँके,२४ बैशाख ।
नेपाल–भारत सीमा क्षेत्रको सुरक्षा सुदृढीकरण, आवागमन व्यवस्थापन, रेल सेवा सञ्चालन तथा द्विपक्षीय समन्वयलाई थप प्रभावकारी बनाउने उद्देश्यले रुपैडिहास्थित इन्टिग्रेटेड चेक पोस्ट (आईसीपी) मा दुवै देशका उच्च सुरक्षा अधिकारीबीच समन्वय बैठक सम्पन्न भएको छ ।
बैठकमा भारतको सशस्त्र सीमा बल (एसएसबी) ४२औँ वाहिनी, नेपालको सशस्त्र प्रहरी बल (एपिएफ) तथा भारतको पूर्वोत्तर रेलवेका वरिष्ठ अधिकारीहरूको सहभागिता रहेको थियो । सीमा व्यवस्थापन, यात्रु आवागमनमा सहजता, रेल सेवा सञ्चालन र सुरक्षा संयन्त्रबीचको सहकार्यका विषयमा विस्तृत छलफल गरिएको सशस्त्र प्रहरी बल, लुम्बिनी प्रदेशका प्रमुख प्रहरी नायब महानिरीक्षक दिपेन्द्र कुँवरले जानकारी दिए ।
एसएसबी ४२ औँ वाहिनीका कमान्डेन्ट गिरीश चन्द्र पाण्डेयले बैठकको मुख्य उद्देश्य नेपाल–भारतबीचको समन्वयलाई अझ सुदृढ बनाउँदै सीमा क्षेत्रमा सुरक्षा र सेवा प्रवाहलाई प्रभावकारी बनाउनु रहेको बताए ।
बैठकमा एसएसबीका डिआइजी वी. विक्रमन र मुन्ना सिंह, सशस्त्र प्रहरीका डिआइजी कुँवरलगायत दुवै देशका सुरक्षा निकायका उच्च अधिकारीहरूको उपस्थिति रहेको थियो । त्यसैगरी भारतीय रेलवेका सिनियर डिभिजनल अपरेसन म्यानेजर अनुजकुमार सिंह तथा यातायात विभागका अधिकारीहरू पनि सहभागी थिए ।
बैठक पश्चात् सहभागी अधिकारीहरूले रुपैडिहास्थित नवनिर्मित नेपालगन्ज रोड रेलवे स्टेशनको स्थलगत निरीक्षण गर्दै पूर्वाधार, सुरक्षा व्यवस्था तथा सञ्चालन तयारीबारे जानकारी लिएका थिए । निरीक्षणका क्रममा नेपाल–भारत रेल कनेक्टिभिटी, नेपालसम्म भारतीय रेलको पहुँच तथा विभिन्न पूर्वाधार परियोजनाबारे विस्तृत जानकारी आदान प्रदान गरिएको थियो ।
भारतीय रेलवेका सिनियर डिभिजनल अपरेसन म्यानेजर सिंहले यही महिनाको अन्त्यसम्म नेपालगन्ज रोडबाट रेल सेवा सञ्चालन हुने अपेक्षा गरिएको जानकारी दिँदै सेवा सुरु भएपछि समय तालिका वा व्यवस्थापनमा देखिने समस्या आवश्यकताअनुसार सुधार गरिने बताए ।
कार्यक्रममा एसएसबी ४२औँ वाहिनीका डिप्टी कमान्डेन्ट शशि भूषण, सहायक कमान्डेन्ट अमित कटियार, सुनील कुमार, शान्ति लगायत सुरक्षा अधिकारीहरू तथा नानपारा रेलवे पुलिस फोर्सका प्रभारी उपनिरीक्षक धनवन्त सिंहसहित अन्य कर्मचारीहरूको उपस्थिति रहेको थियो ।
कार्यक्रमका क्रममा दुवै देशका अधिकारीहरूले सीमा क्षेत्रमा शान्ति, सुरक्षा, आपसी सहकार्य र वातावरणमैत्री पहललाई प्रवद्र्धन गर्दै द्विपक्षीय सम्बन्धलाई अझ मजबुत बनाउने प्रतिबद्धता व्यक्त गरेका छन् ।
